挑戰新界單車網絡｜元朗出發三大路線影相打卡熱點
呢幾個weekend天氣都唔錯，可以去踩吓單車，舒展吓筋骨！運動會促進「快樂因子」多巴胺嘅分泌，呢排真係勁需要尋找快樂因子！踩單車之餘可以影吓相，沿途好山好水好風景，天氣好嘅唔使後製構圖都好靚，加埋filter就係「IG-able」嘅靚相！
元朗去南生圍呢段路係可以經常去，因為影相靚又有豆腐花食，真係好寫意人生咁！元朗去屯門就會經過好多個輕鐵站，終點去到屯門碼頭睇吓海，睇吓日落都幾療癒！屯門去馬鞍山單車徑全長60公里真係超長，全面開放咗無耐已經好多人去，成程就踩唔掂㗎喇，試咗由元朗去上水！
☆元朗去上水
元朗西鐵站出發去上水火車站來回，原來來回都要40公里，用咗4個鐘頭先完成，但真心覺得超級唔適合新手，元朗去上水段路暗斜超級多，又多上落位，單車路設計真係有待改善！經過路程都有人炒車，部份仲有醫護到場，真係要小心謹慎，唔好踩太快！
路程會經過南生圍對出錦田河，有一個點都幾靚，又河又藍天咁，真係景色優美！
其中有一條大斜路，真係踩到上去真係喘晒氣！
路經雙魚河仲可以睇埋日落之美！
去到上水石上河有條橋係全部都藍色，加filter之後好似好夢幻咁！
☆元朗去南生圍
新手都可以試吓係元朗去南生圍，來回差不多20公里用兩個鐘就可以完成，入到去南生圍仲有得食豆腐花，影相又靚，假日就人多車又多，影相打卡可能要等一等！但自從開放屯門去馬鞍山單車徑，入南生圍段路係小咗單車，可能大家都想試一試新路線。
入南生圍嘅路段會經過高架天橋，下面就係錦田河，呢度影相都幾靚㗎！
沿路有間食豆腐花，仲有個水塘，可以影張相先再繼續！
南生圍必影景點，真係要排隊影，好多人都係呢度影過張相！夏天去勁好太陽時影係最靚嘅！
另一邊有森林嘅感覺！扮野餐都幾正！
仲有一條全部都係樹嘅路，日落時影，好有feel㗎！
☆元朗去屯門
元朗去屯門來回都係差不多20公里，中途會經過好多輕鐵站，近排係芒草嘅季節，沿途有啲芒草可以影吓！
最後去到屯門碼頭，影張好多船嘅相先！
再入啲睇埋日落，望吓海，心情都舒坦好多！
運動係好，但都要注意安全，千萬要小心謹慎，唔好勉強自己！疫情放緩再去過！
☆Facebook☆
Natalie ★instagram★ ☆Facebook☆
Blog ☆Beauty Exchange☆
★She.com★
☆U Blog☆
★Blogspot★
for any enquiries pls contact
chunatalie4@gmail.com
留言
張貼留言