正宗川菜、北京填鴨誠意推介｜「金公館」太古店

呢排可以出去食晚飯，食得外賣多真係要食啲堂食先會食嘅嘢先^^ 北京填鴨都係我心目中，中菜No.1！麻辣我都好鐘意，但同時地又想食麻辣，又想食北京填鴨，推介去位於太古嘅京川粵菜「金公館」。正宗四川大廚坐鎮，川菜好出色，同時又有北京填鴨，經過門口有專人處理，即點即切！

食北京填鴨最緊要係，塊鴨皮唔可以淋，唔係會咬唔開。包住鴨果塊皮又不能太厚，又唔可以太薄，容易一拎就爛，個汁又不能太咸。「金公館」嘅北京填鴨，皮片得夠薄，唔會片埋啲肉，真係正宗片皮鴨！

傳統烤鴨方法，加上片走鴨皮中間之油脂，無油膩感可以食多幾塊！烤鴨嘅表皮燒到金黃色，皮夠脆又唔油膩！個人認為北京填鴨推介真係要剩係片鴨皮先係正宗，片埋啲鴨肉感覺好似食燒鴨咁！鴨嘅本身重要，但其實個餅皮都好重要，餅皮唔可以厚同埋痴埋一齊，金公館好細心地每塊餅皮中間都有一張蒸紙，方便拎嚟夾片皮鴨。

北京填鴨醬料選擇好多有甜麵醬、桂花醬、麻醬及酸梅醬。新鮮配菜青瓜條、京蔥絲、蜜瓜條及西芹絲。個人北京填鴨推介口味青瓜條、京蔥絲加甜麵醬，真係絕配！

酸菜魚嘅材料辣椒及酸菜都來自四川，傳統古法埋壇老壇醃制酸菜，新鮮菜加埋秘制香料醃制至20至30天，小葉無筋酸菜，食材選用好新鮮，魚肉完全無腥味，料又多！

爽脆嘅酸菜好開胃，湯底花椒好香，加上新鮮魚肉，麻而不辣，真係酸爽享受！連魚皮嘅魚肉，食材新鮮烹調方法都好重要，真係要好新鮮先可以無腥味，魚肉啱啱熟，肉質好滑！

霸王辣子雞嘅份量真心多，平時食啲辣椒一定多過雞，呢度嘅份量好辣椒同雞差不多，仲加咗貴價嘅腰果代替花生，麻辣花椒香味酥脆感十足，超正下酒菜。

蒜泥白肉偏向麻辣味，中間夾咗青瓜，解白肉嘅油膩感。

四川擔擔麵，好濃嘅花生味，成個湯好濃，仲有小小麻辣。

青城山杏汁猪肺湯，成個湯煮到奶白色，足料靚湯，最緊要無味精。

出街食飯我都幾注重上菜嘅時間，「金公館」嘅上菜時間都好快，同埋啲菜上到枱嘅時候都仲係熱，一出菜就拎上枱，服務上算不錯。

餐廳環境都好寬躺，卡位坐得舒服，傾計聚餐都好舒適。

枱邊仲有埋熱水爐，沖茶方便，隨時都有熱茶飲，細心服務。

個餐仲送咗支紅酒，啱晒我們邊食邊吹吹水，親朋戚友想傾計聚餐真係好適合。

正宗川菜、北京填鴨推介，好食料又多！行開太古可以去試吓京川粵菜金公館！

金公館

地址：太古康山道1-2號康怡廣場北座3樓T4號舖

Natalie ★instagram★ ☆Facebook☆

for any enquiries pls contact

chunatalie4@gmail.com

Natalie Luv Beauty