台灣面膜篇
落左幾日雨，天氣開始轉秋天，係咪真架，呢個時間又熱唔晒又唔係話凍，一定要做定轉季嘅準備，敷定面膜等早秋。面膜日日都會用，所以不能下下都買貴野，因為未發達。台灣面膜就啱晒，高CP值，價錢又平。有好多品牌都有出面膜呢款產品，有間仲剩係出面膜就紅。
我的美麗日記升Lv版面膜
我的美麗日記應該無人唔識啦，紅左咁多年，但佢有兩款一定要再講，因為佢威到係2015年拎左日本Cosme面膜類大賞No.1 ＆ No.3。今年仲出左升級版，3效完美超導滲透，極絲裸膚水凝布膜。No.1 黑珍珠面膜高分子聚水精華提升肌膚透明度，持續保濕。No.3官燕窩面膜彈潤保濕，輕鬆打做Q彈肌。
即刻敷返個No.1 面膜先，唔好講咁多。
黑珍珠面膜係2016年上半年做保持人氣，雖然名次落居日本Cosme面膜類大賞No.2，但都算係台灣之光。好威威呀！好希望香港都出多D自家品牌。
其他紅酒(大S出書介紹過)、玻尿酸、膠原蛋白、角鯊烯4款OUT左喇，我都唔知，好彩得返各1，用完可以買升呢版啦。
Sexy Look金箔補水上下分工雙面膜
呢款面膜上年發佈會請黎藤井Lena，幾重視呢款面膜。全球首創分開上下兩部份，上黑面膜主要做保濕，下白面膜做返拉提。黑面膜超強保濕力又係玻尿酸嘅功勞(太鐘意玻尿酸)，下半部保濕之餘仲有胜肰緊膚成分做埋V面。實在太好，唔使敷完保濕嘅再敷緊緻嘅面膜，一次滿足2個願望。面膜上面仲有金箔，幾虛榮。
Simply玻尿酸活水保濕面膜
呢款面膜第一眼吸引到我並唔係咩玻尿酸保濕(雖然我愛佢)，而係當中有一個成分藍銅胜肽。藍銅胜肽係台灣被譽為《美容界黃金》，聽到都嚇一嚇，係咪勁先。好多醫學美容診所會建議客人打完LASER之後用，因為DR們都知道佢修護力好又溫和。而且藍銅胜肽同玻尿酸夾埋一齊會有完美修護效果。呢款面膜敷完即刻退紅，因為我呢D敏感肌皮膚狀況好唔穩定，塊面間中會好紅。太鐘意呢款面膜，但唔知香港邊度有得買，好想知，快D話我知啦。
講左3個品牌面膜，今集講嘅係台灣有背景嘅品牌。咩背景，咁一定唔係MK背景，係有醫美背景。
DR.WU膠囊面膜Vitamin A, B, E
呢款DR.WU膠囊面膜係台灣買，話時話，唔知香港有無得買。之前用過DR.WU玻尿酸保濕微導面膜非常好用，保濕度高又貼面，台灣No.1醫學美容品牌喎，真係好有信心。而呢款面膜比其他系列平，一盒差成200台幣，沒有最好用只有更抵用。仲有8款不同功效選擇，我就買左3款咋，買晒咁多款我就要儲下錢先。Vit A深層保水、Vit B舒緩保濕、VIt E緊緻抗皺，3款我揀左2款都寫住Target: Aged Skin，嗯嗯。有塊藍色布咁嘅野我會用黎敷埋頸，唔好嘥呀嘛。
NARUKO白玉蘭鑽采超緊緻美白拉提面膜EX
睇台灣節目［女人我最大］認識牛爾老師，而呢個品牌就係佢出架喇。
NARUKO白玉蘭系列係台灣第一個社區公平交易計劃的保養品，用台灣土生土長嘅有機白玉蘭，以合理價錢直接向原產地農民購買製作，落實社區公平交易計劃。更將營利20%捐出作為偏鄉學童嘅助學金。太滾動，敷MASK之餘又可以做善事，實在係樣靚心更靚，我肯肯定係有內涵又有美貌，嗯嗯。呢款面膜主要成分係白玉蘭，去黃阻黑，修護抗老，3D剪裁布膜仲可以做埋拉提。記得美白面膜唔可以日日用，另外溫提有敏感情況一定唔用得有美白成分產品。
森田藥粧黑珍珠極緻潤白黑面膜
森田藥粧點解好有日本Feel，原因係第二代經營者移過民去日本，希望學習到日本企業及品牌精神。呢款高濃度美容液黑面膜系列，香港代理商無入，唔開心。成分有頂級黑珍珠萃取、日本進口玻尿酸、分子酊迅速鎖水及膠原蛋白，有效淡化暗沉，水嫩煥白肌膚。如果香港代理之後有入就好喇。
唔好意思我真係太鐘意玻尿酸，所以大部分面膜都有佢出現。
PS：玻尿酸＝透明質酸，只係台灣譯名唔同。
訂閱Natalie YouTube
instagram
Blog
Facebook
for any enquiries pls contact: chunatalie4@gmail.com
留言
張貼留言