人人心中都有一碗沙嗲牛麵

IMG_1287
早排睇左篇潮文,話見過世面嘅女人去得了高級餐廳也去得了路邊攤,我咁為食,平貴都食,我仲唔係見過世面嘅女人haha。香港地踎文化一定係茶餐廳,當中太多野食,奶茶真係我最愛。我會去不同嘅茶餐廳會食不同嘅野,因為我覺得每一間茶餐廳都會有佢靈魂菜式。

以前尖沙咀返工成日都食沙嗲牛麵,有一間好舊式茶餐廳喺Isquare對面,不過幾年前已經無左T.T。佢個沙嗲牛麵真係太好食,好濃沙嗲加蒜味,仲有佢個五香牛腩,OMG無得再食,無喇T.T。呢間舊式茶餐廳我老豆細個已經食,好鬼耐架喇,我都由細食到大。點解會無左。。。追查之下知道原來老闆賣左間舖,賣左成億幾,嘩,俾我都唔做啦,仲沖茶俾你飲,煮麵俾你食咩。。。太衰喇啲財團,買起左我心目中最好食嘅沙嗲牛麵T.T,仲用左億幾黎買,太過分喇,還我沙嗲牛。。。T.T
IMG_1280
近排突然好想搵返我心中嘅沙嗲牛麵,有個長沙灣街坊推介新華茶餐廳。為左食,去到幾遠我都會haha,長沙灣濕濕碎。街坊表示最好係星期一至五去,因為唔知點解星期六日會無咁好食。但我星期六去食,覺得個牛都可以,但有一個致命嘅弱點就係個湯唔夠熱。嗯,我知道尋找味道呢個係一個好艱難嘅任務,唔緊要,我再搵。BTW佢杯奶茶幾好飲,茶夠香,奶夠滑。
IMG_1281
新華茶餐廳
地址:香港長沙灣青山道334號

IMG_1271
另一間係灣仔嘅茶餐廳,雞批非常好食,連我唔太鍾意食雞批都會買黎食,食飽仲會打包。呢間茶餐廳亦都係我第一間飲到凍奶茶唔係加冰嘅,係雪櫃拎出黎,原汁原味凍奶茶。不過而家戒飲凍野無叫到,所以無影相。呢度個麵餐跟菠蘿包,菠蘿包好舊式味道,嘩,真係抵食夾大件^^
fullsizeoutput_2097
講返正題先,呢度個沙嗲牛麵個味都好濃,但又係有一個致命嘅弱點就係個湯唔夠熱。OMG到底我幾時可以搵到我嘅心中沙嗲牛肉麵T.T
IMG_1270
金鳳茶餐廳
地址:香港灣仔春園街41號

IMG_1286
最後睇左好多食評,睇左呢間茶記原來係我成日食早餐嘅,點解我唔知佢個沙嗲牛麵咁好食>.< 因爲我次次去食都係食鮮牛肉米同埋豬排麵,佢個炸豬排真係超好食,皮薄炸得好香,個麵係出前一丁黎(轉蟹王麵加$2),即叫即煮。呢個沙嗲牛好濃味,雖然無之前果間咁香蒜味,但有一陣花生香,湯又夠熱,嘩真係正!總有一個可以代替下^^ 仲有佢杯奶茶好好飲,茶味同奶好夾,茶又夠滑,凍嘅都好好飲,因為有時加左冰會淡左,但呢度唔會。呢間舖由朝到晚都好多人,早晚都賣麵,可以幾時都去食,不過6點就收,唔做晚市。
IMG_1287
永順食店
地址:元朗安寧路2號冠煌樓地下

味道真係令人有回憶,如果有機會食返我心中果碗沙嗲牛麵,我諗我會滾動到一個點。我敢肯定,再食唔返心中果碗沙嗲牛麵,因為回憶總是最美好的。。。


訂閱Natalie ☆YouTube☆ ★instagram★ ☆Facebook

VOOV直播 ★Natalie Chu★ ID:600204301

Blog
She.com
U Blog
Blogspot

for any enquiries pls contact

留言

熱門文章